Tema dos debates 2015

Coa chegada das pasadas eleccións europeas abriuse de novo o eterno debate sobre a maioría de idade legal. Meses máis tarde, o referendo escocés permitiu votacións dende os 16 anos, igual que fan outros países europeos, como Austria -dende o ano 2002-.
En España, aínda que a maioría de idade legal se establece a partir dos 18 anos -igual ca na maior parte dos países do mundo-, a "maioría de idade sanitaria" sitúase nos 16 anos, idade á que unha persoa pode decidir sobre tratamentos que lle afecten ao seu corpo sen requirir autorización paterna. Igualmente, ten dereito á emancipación, pode empezar a traballar, casar e, mesmo dende idades máis temperás, pode manexar armas de fogo ou manter relacións sexuais con persoas maiores de 18.

Así pois, a situación semella contraditoria e este fondo debate permanece aberto. Considerando estes datos a nivel estatal, a organización do PX´15 ten a ben centrar os encontros dialécticos da fase preliminar sobre a seguinte cuestión: debería adiantarse a maioría de idade legal aos 16 anos?

Igual ca na pasada edición, o tema da fase preliminar é o mesmo para as categorías de ESO e de bacharelato. Moito ánimo!!!